Vilnius, 20 qershor 2024 – Në margjinat e Konferencës Ndërkombëtare Anti-Korrupsion të 21-të në Vilnius, Lituani, Drejtori i Agjencisë për Parandalimin e Korrupsionit (APK), Yll Buleshkaj, mori pjesë në takimin e nivelit të lartë të autoriteteve të zbatimit të ligjit dhe parandalimit të korrupsionit. Ky takim, i bashkëdrejtuar nga Linas Pernavas, Drejtor i Shërbimit Special të Hetimeve të Lituanisë dhe Catherine De Bolle, Drejtoreshë Ekzekutive e Europol-it, mblodhi udhëheqës nga mbarë bota për të diskutuar sfidat dhe zgjidhjet për parandalimin dhe luftimin e korrupsionit të nivelit të lartë.
Në takim u diskutuan tema kyçe, përfshirë ndikimin e korrupsionit të nivelit të lartë në zhvillimet globale, strategjitë për zbulimin e skemave të sofistikuara dhe sfidat në sjelljen para drejtësisë të zyrtarëve të korruptuar. Catherine De Bolle theksoi nevojën për bashkëpunim ndërkombëtar për të luftuar korrupsionin, ndërsa Linas Pernavas vuri në dukje rëndësinë e pavarësisë së autoriteteve të parandalimit, hetimit dhe gjyqësore.
Drejtori i APK-së thekson rëndësinë e bashkëpunimit global. “APK është e përkushtuar të punojë me partnerët tanë ndërkombëtarë për të çmontuar korrupsionin në të gjitha nivelet,” tha Drejtori Buleshkaj,. “Kjo konferencë ofroi një platformë të vlefshme për ndarjen e praktikave më të mira dhe forcimin e përpjekjeve tona kolektive. Shpirti dhe vetëmohimi i Xhovane Falkone duhet të mbetet shembulli jonë’’.
Në përfundim të takimit, pjesëmarrësit, përfaqësues nga më shumë se 30 shtete nga e gjithë bota, miratuan një deklaratë të përbashkët, duke riafirmuar përkushtimin e tyre për të luftuar korrupsionin e nivelit të lartë dhe për të forcuar sundimin e ligjit. Ky angazhim global është një hap i rëndësishëm drejt një të ardhmeje më transparente dhe të drejtë.
Për me shume: https://shorturl.at/OAxYG
